Æд уидæгтæ афæлдæхтысты бирæ бæлæстæ, æртыдтой электрон тыхдæттæг телтæ, хицæн ран дымгæ хæдзары сæртæ систа
Республикæйы цы уарынтæ æрцыд, ранæй рæтты тыхджын дымгæ æмæ ихимæ, уыдон бахъыгдæрдтой Алагиры, Æрыдоны, Горæтгæроны, Кировы, Рахизфарсы районтæ æмæ Дзæуджыхъæу. Æд уидæгтæ афæлдæхтысты бирæ бæлæстæ, æртыдтой электрон тыхдæттæг телтæ, хицæн ран дымгæ хæдзары сæртæ систа æмæ сæ æрæвæрдта фæндагыл. Кировы районы, Даргъ-Къохы та тыхдджын уарыны аххосæй стыр уæзласæн машинæйы шофыр нæ сарæхст æмæ йæхи бахаста хæдзармæ. Зиан дзы не рцыд.
Ныртæккæ æрдзон фыдбылызы фæстиуджытæ иуварс кæнынц сæрмагонд куыстуатты специалисттæ, æнæнхъæлæджы цауты министрады службæгæнджытæ.
Æрдзон фыдбылызы аххосæй сæрмагонд уавæр сфидар кодтой Рахизфарсы æмæ Æрыдоны районты. Ахæм уынаффæ хаст æрцыд, знон хицауады сæрдар Тускъаты Таймураз æвæстиатæй цы æмбырд сарæзта, уым. Тæрккъæвдатæ æмæ тыхджын дымгæйы аххосæй ацы районты хицæн хъæутæ баззадысты æнæ бастдзинадæй, электрон тыхæй æмæ донæй.
Дымгæ систа иуæй-иу хæдзæртты сæртæ, афæлдæхта бæлæстæ, Æрыдоны районы фылдæр зиан хаст æрцыд Хъæдгæронæн, Мичурины æмæ Нартыхъæутæн. Бирæ хъæутæ баззадысты æнæ рухсæй, донæй æмæ æрдзон газæй.
Уæлдæр куыд загътам, афтæмæй сæрмагонд уавæр фидаргонд æрцыд Рахизфарсы районы дæр. Тыхджын дымгæ бирæ хæдзæрттæн систа сæ сæртæ, афæлдæхта бæлæстæ, æнæнхъæлæджы уавæрты министрады, зынгхуыссынгæнджыты бахъуыд æнæниздзинадæн тæссаг хæдзарæй адæмы æдас бынатмæ ракæнын. Се хсæн сывæллæттæ дæр.
Стыр зиан хаст æрцыд медицинон центрæн, цалдæр рæвдауæндонæн, пъæлицæйы хайадæн. Фарны хъæуы уарындæттæ бакалдысты хæдзæрттæм. Æнæхъæн хсæв бынаты куыстой энергетиктæ. Æрдзон фыдбылызы фæстиуджытæ аиуварс кæнынмæ Рахизфарсы районмæ æрвыст æрцыд аэромобилон къорд дæр. Ныртæккæ хъæуы фæстиуджытæ аиуварс кæнын.
