Æмбырды стыр æргом аздæхтой национ проект «Æнæниздзинадхъахъхъæнынады» нысанмæ арæзт республикон программæ «Зæрдæйы æмæ тугдадзинты низты ныхмæ тох»-мæ
Хицауады Сæрдар Тускъаты Таймураз видеоконференцийы фæрцы æмбырд сарæзта республикæйы æмæ районты медицинон куыстуæтты разамонджытимæ, стæй медицинон наукон æхсæнады минæвæрттимæ. Архайдтой дзы Æхсæнадон палатæйы уæнгтæ дæр. Æмбырды стыр æргом аздæхтой национ проект «Æнæниздзинадхъахъхъæнынады» нысанмæ арæзт республикон программæ «Зæрдæйы æмæ тугдадзинты низты ныхмæ тох»-мæ. Премьер куыд бафиппайдта, афтæмæй ацы низтæ дзæбæх кæныны хæрзхъæддзинад хъæуы фæхуыздæр кæнын. Уый у регионалон хицауады фыццаградон хæстæй иу. Уымæ гæсгæ Цæгат Ирыстоны æххæстгонд цæуы ведомствойы нысанмæ арæзт программæ. Низы ныхмæ ахадгæдæр тох куы цæуа, уæд дзы адæм къаддæр мæлдзысты. Фарста алыг кæныны тыххæй хъæуы медицинон тыхтæ баиу кæнын, æмæ йæм æхсæнады, стæй дзыллон информацийы фæрæзты ргом здахын. Нæ цæрджыты æдасдзинад у æппæтæй ахсджиагдæр хъуыддаг, загъта премьер.
Æнæниздзинадхъахъхъæнынады министр Годжысаты Тамерлан йæ доклады бæстон æрдзырдта зæрдæйы низтæ дзæбæх кæныны мадзæлтты тыххæй. Фæстаг азты республикæйы клиникон рынчындоны кусы тугдадзинты регионалон центр. Ныры онг дзы уыди æрмæстдæр иу ангиограф, æмæ суткæйы дæргъы лæггад кодта нæ регионы цæрджытæн къуыри 5 боны. Цалдæр боны фæстæ ма скусдзæн ноджыдæр иу ангиограф. Уый та фадат ратдзæн къуыри 7 боны кусынæн. Профессионалон æххуыс ма кæнынц Цæгат Кавказы бирæвæрсыг медицинон центры Беслæны. Мæздæджы районы центрон рынчындон та хъæуы нырыккон кусæнгæрзтæй сифтонг кæнын, цæмæй ахæм пациенттæн æмбæлгæ æххуыс кæной, уый тыххæй. Нæ республикæйы ма карзæй лæууы, фæлтæрдджын дохтыртæ-кардиологтæ кæй нæ фаг кæнынц, уыцы фарста дæр. Уæлдадæр та районты рынчындæтты. Тускъаты Таймуразы хъуыдымæ гæсгæ, ацы хъуыддагмæ се вæрæн хъуамæ бахæссой поликлиникæты æмæ стационарты разамонджытæ. Фарста алыг кæнынæн ма æххуыс фæуыдзæн социалон программæ «Земский доктор».
