Уарзон экспозици фенæн ис компьютеры уылты
Дунейы коронавирусы пандемия кæй парахат кæны, уый бирæ хъуыддæгтыл фæбæрæг. Уæлдæр ма йæ куыд хъусын кодтам, афтæмæй 28-æм мартъийæ 5-æм апрельмæ нæ бæстæйы нымад у æнæкусгæ къуырийыл. Уымæй раздæр æхгæд æрцыдысты музейтæ æмæ галерейтæ. Уый хыгъд классикон аивад чи уарзы, уыдонæн та нырæй фæстæмæ фæзынд фылдæр гæнæнтæ. Уарзон экспозици фенæн ис компьютеры уылты. Уыимæ – билет нæ балхæнгæйæ, æмæ ма суанг экскурсоводимæ. Куыд андзæвæн ис бæрзонд аивадыл, уый тыххæй дзуры Фидараты Маринæ.
Уарзон экспозици компьютеры уылты фенын. Джусойты Мæдинæ тынг уарзы æмæ аргъ кæны нывкæнынады аивадæн. Архайы алы равдыст феныныл дæр. Фæлæ фæстаг рæстæг йæ къæлиндары хыгъд зынгæ фæкъаддæр, музейтæ æмæ галереятæ кæй сæхгæдтой, уымæ гæсгæ. Ам та йын æххуысы фæрæз разынд интернет.
Нырæй фæстæмæ цымыдисаг равдыст фенынмæ рады лæууын нал хъæудзæн. Билет нæ балхæнгæйæ, æмæ дæ уатæй нæ рацæугæйæ, цыфæнды экспозици дæр хæдзары. Классикон аивадмæ андзæвæн ис куысты уæлхъус дæр.
Егъау галереятæй фæстейы нæ баззадысты бынæттон равдыстадон залтæ дæр. Тугъанты Махарбеджы номыл музей йæ официалон сайты сарæзта онлайн-равдыст. Æппæт æртæ залы дæр фенæн ис алыхуызон цымыдисаг экспозицитæ.
Джусойты Мæдинæйы хуызæн бæрзонд аивадуарзджытæ ацы ногдзинадыл хорз цæстæнгасæй сæмбæлдысты. Афтæмæй сын фадат фæци, раздæр сæ къух цæмæн нæ амыдта, ахæм виртуалон равдыстытæ фенынæн. Эрмитаж, Третьяковы æмæ Берлины галерейтæ, Лувр æмæ афтæ дарддæр. Дунейы æппæтæй зындгонддæр музейтæ цæттæ сты се ппæты суазæг кæнынмæ. Уыимæ – лæвар, æмæ ма суанг экскурсоводимæ.
Александр Пушкины номыл нывкæнынады аивады паддзахадон музейы цæгат-кавказаг филиал та ссардта цымыдисаг ногдзинад. Социалон хызты равæрынц æнæхъæн экскурситæ. Зæгъæм, зындгонд дагестайнаг нывгæнджыты равдыст. Уымæй дарддæр ма фадат радтой ирыстойнаг нывгæнджытимæ онлайн-ныхас кæнынæн. Виртуалон проект «Аланика он-лайн»-ы фæрцы нæ республикæйы нывгæнджытæ сæ куыстыты равдисдзысты æппæт дунейы ныртæккæйы актуалондæр темæ – пандемияйы ахадындзинад æхсæнадыл.
Уыимæ симпозиум «Аланика» ивд нæ цæуы. Музейы филиал нысан кæны ног экспозицитæ аразын дæр. Цæмæй, вирусимæ уавæр куы фæхуыздæр уа, уæд та ногæй аивадуарзджытæн сæ дуæрттæ байгом кæной, уый тыххæй.
