Йæхи цардæн тæссаг уавæрты рынчынтæн æххуыс кодтой дохтыртæ, медицинон хотæ, санитаркæтæ æмæ ма суанг бархионтæ дæр
Зын сахат коронавирусы ныхмæ хъазуатонæй чи тох кодта, уыцы медицинон кусджыты номыл арæзт уыд кадджын мадзал. Йæхи цардæн тæссаг уавæрты рынчынтæн æххуыс кодтой дохтыртæ, медицинон хотæ, санитаркæтæ æмæ ма суанг бархионтæ дæр. Кады гæххæттытæ æмæ æндæр хæрзиуджытæ райстой 1900 адæймаджы. Сæ куыстæн сын аккаг аргъ скодта республикæйы сæргълæууæг Битарты Вячеслав.
Рынчынты нымæцыл бонæй бонмæ æфтыд. Низимæ тох кæнынмæ рацыдысты мингай цæгатирыстойнаг дохтыры. Хаттæн иу уавæр уыйбæрц фæкарз, æмæ иу загътой, нæ бон дарддæр ницыуал у. Фæлæ уæддæр дохтырты дæсныдзинад æмæ сæрæндзинады фæрцы, стæй хиипæрды фæткы руаджы низы къæпхæн фæныллæгдæр кодтой. Уавæр зынгæ фæхуыздæр. Ныр кадджын уавæры хъæбатыр дохтырты хорзæхджын кодта Битарты Вячеслав.
Уыцы рæстæг уæхи аккаг равдыстат — бафиппайдта Битарты Вячеслав. Иу мин авдсæдæ специалистæн та саккаг кодтой республикæйы разамонæджы хæрзиуджытæ. Кадджын мадзалмæ æрбацысты хуыздæрты хуыздæртæ. Уыдонæй дыууæйæн саккаг кодтой республикæйы фæллойы хъæбатыры нæмттæ, фондзæй систы республикæйы сгуыхт дохтыртæ, дыууын дыууæйæн радтой Цæгат Ирыстоны сгуыхт дохтырты нæмттæ. Уимæ уыцы хорзæхтæм бар нæ дардтой нæдæр дохтырты кар, нæдæр сæ раздæры фæллойадон сгуыхтдзинæдтæ. Сæйрагдæр кастысты коронавирусимæ тохы цы бæрæггæнæнтæ равдыстой, уымæ. Паддзахадон хæрзиуæг кæмæн радтой, уыдонæй иу у Цæгат Ирыстоны медицинон академийы студент Уртаты Аслан. Фæссаууонмæ ахуыр кæнгæйæ, æнæзæрдæхудтæй кусы республикæйы клиникон рынчындоны сырх зонæйы.
Фæлæ уæддæр сæ хуыздæр хорзæхыл дохтыртæ нымайынц, мæлæты къухæй кæй ратыдтой, уыцы рынчынты амондджын цæстæнгас. Уый тыххæй иу хатгай рохуаты баззадысты сæ бинонтæ, сывæлæттæ, сæ хæдзæрттæ. Уæвгæ сæм цыбыр рæстæджы фæстæ сæ раздæры рынчынтæ æд бинонтæ арфæтимæ цæуын райдыдтой.
Æмуæхскæй дохтыртæ тох котой сæ рынчынты цардыл. Сæхи æдасдзинад та бафæдзæхстой хи бахъахъхъæныны фæрæзтыл. Ахæм уæлæдарæсы кусын се нцонтæй нæ уыд, уæлдайдæр та æнтæф бонты. Фæлæ уæддæр дохтыртæ дарддæр æххæст кæнынц сæ вазыгджын æмæ ахсджиаг хæс.
