Уацхæсджыты фылдæр хай раивтой дардмæ куыстмæ, кæмдæрты та райдыдтой цалцæггæнæн куыстытæ кæнын
Ныртæккæйы уавæр хынцгæйæ, зынгæ ивддзинæдтæ æрцыдысты Цæгат Ирыстоны газетты редакциты. Уацхæсджыты фылдæр хай раивтой дардмæ куыстмæ, кæмдæрты та райдыдтой цалцæггæнæн куыстытæ кæнын. Сæйрагдæр у уый, æмæ журналисттæ дарддæр æххæст кæнынц сæ профессионалон хæс. Фæлæ, æнæмæнг, æдасдзинады домæнтæ æххæст кæнгæйæ.
Газет «Северная Осетия»-йы кусджыты иу къорд раивтой дардмæ куыстмæ. Ныртæккæ алы номыры фылдæр хай баст вæййы коронавирусы тыххæй хъусынгæнинагимæ. Уæвгæ та газет цæуы ног хуызы.
Æнцондæр уавæры нæй газет «Рахизфарсы цард» дæр. Пандемияйы рæстæг зындзинæдтæ фæзынди рекламон æрмæджытимæ. Уый та фæзынди кусджыты мыздыл. Ныртæккæ газеты алы номырыл кусы 3 адæймаджы, иу уацхæссæг кусы дардмæ. Иннæ кусджыты арвыстой отпускты.
Ахæм уавæртæ ис газет «Владикавказ»-ы редакцийы дæр. Газет рафыссыны кампани фæкъуылымпы. Журналисттæ æххæст кæнынц хи изоляцийы домæнтæ.
Журнал«Мах дуджы» та, зæгъæн ис, æмæ сæвзæрд уавæрæй спайда кодтой. Райдыдтой дзы цалцæггæнæн куыстытæ кæнын. Раздæры фæткмæ гæсгæ куы куыстаиккой, уæд сын нæ бантыстаид. Стæй ма рахастой уынаффæ, дыууæ хæстæгдæр номыры баиу кæныны тыххæй, æмæ баст уыдзæн Фыдыбæстæйы Стыр хæсты 75 азы бонимæ.
Ныры уавæртæ нæ хынцгæйæ, периодикон мыхуыры фæрæзтæ сæ куыст нæ баурæдтой. Уымæн æмæ ахæм рæстæг цыфæнды хъусынгæнинаг дæр у ахсджиаг. Журналисттæ дарддæр æххæст кæнынц сæ профессионалон хæс. Фæлæ, æнæмæнг, æдасдзинады домæнтæ æххæст кæнгæйæ.
