Медицинæ | ГТРК «Алания»

«Иумæ онкологон низты ныхмæ». Цæгат Ирыстоны онкодиспансеры арæзт æрцыд гом дуæртты бон. Сæ фæлтæрддзинадæй фæхайджын кæнын æмæ медицинон æркаст скæныны тыххæй нæ республикæмæ ссыдысты федералон наукон центрты хуыздæр специалисттæ. Пациенттæн ма иу хатт фадат фæзынд се нæниздзинадмæ æркæсынæн. Бæлвырддæр хабæрттæ базонæн ис Сосранты Жаннæйы сюжетæй. 6 азы размæ Мæхъиты Лянæмæ раиртæстой онкологон низ. Дохтырты æнтысджын куысты фæрцы, пациенткæйы буары низ парахат нал кæны. Куыд зæгъы афтæмæй, мæскуыйаг специалисттæ республикон онкологон диспансеры кæсдзысты рынчынтæм, уæд æй бафæндыд йæхи ныффыссын. Мадина Кумышева рады лæууы ультразвукон иртæстмæ. Консультацимæ æрбацыд Кæсæг- Балхъарæй. Мæдинæйы ныхæстæм гæсгæ, тæрсгæ ризгæйæ бацæуы алы кабинетмæ дæр. Фæлæ йæ æмбары – профилактикон æркаст пайдайаг у рагагъоммæ низ раиртасынæн, уыимæ базонын тæссаг у онкологон низæй фæрынчын уæвын, æви нæ. Специалисттæ æркастысты алы хуызы патологитимæ адæммæ. Дохтырты хъуыдымæ гæсгæ, ахæм профилактикон æркастытæ пайдайаг сты, куыд низ раиртасынæн, афтæ йæ сдзæбæх кæнынæн дæр. Республикæ бабæрæг кодтой Мæскуыйы медицинон центрты хуыздæр 5 специалисты. Се хсæн маммологтæ, химиотерапевттæ, урологтæ. Дыууæ бонмæ лæвар медицинон æркаст скодтой 300 адæймагæн. Специалисттæ куыд фæбæрæг кодтой, афтæмæй, онкологон низтимæ адæмы нымæц азæй азмæ кæны фылдæр. Сывæллæттæ хъахъхъæныны боны агъоммæ та ма сарæзтой æркаст сабиты æнæниздзинадмæ. Дохтыр педиатр-иммунолог, медицинон наукæты доктор Андрей Продеус Дзæуджыуы ис фыццаг хатт, куыд зæгъы афтæмæй акцийы сæйраг хæс у ирыстойнаг æмкусджыты сæ фæлтæрддзинадæй фæхайджын кæнын. Акци саразджытæ куыд зæгъынц, уымæ гæсгæ мадзал суыдзæн традицион. Специалисттæ Ирыстон бабæрæг кодтой онкологон низæй рынчынты аппæтуæрæсеон ассоциацийы æмæ республикæйы æнæниздзинадхъахъхъæнынады министрады æмгуыстады бадзырдмæ гæсгæ.